కొమ్మాల జాతరకు ఉత్సవ కమిటీ ఉన్నట్టా… లేనట్టా..?
చైర్మన్ లేకుండానే కొనసాగుతున్న బ్రహ్మోత్సవాలు
జాతర దగ్గరపడినా కమిటీ నియామకంపై స్పష్టత లేదు
వర్గపోరే ఆలస్యానికి కారణమా?
పారదర్శకతపై భక్తుల్లో సందేహాలు
సమన్వయం లేకపోతే అవ్యవస్థ తప్పదన్న ఆందోళన
కాకతీయ, గీసుగొండ : కొమ్మాల శ్రీ లక్ష్మీనరసింహస్వామి జాతర సమీపిస్తున్న వేళ ఉత్సవ కమిటీ నియామకంపై నెలకొన్న అనిశ్చితి చర్చనీయాంశంగా మారింది. కమిటీ ఏర్పాటు కాకుండానే బ్రహ్మోత్సవాల ఏర్పాట్లు కొనసాగుతుండటంతో భక్తుల్లో సందేహాలు వ్యక్తమవుతున్నాయి. ప్రతి ఏడాది జాతరకు ముందస్తు ఏర్పాట్లు, ఆర్థిక వ్యవహారాలు, భక్తులకు సౌకర్యాల కల్పన వంటి అంశాలను పర్యవేక్షించేందుకు ఉత్సవ కమిటీ ఉండటం ఆనవాయితీ. అయితే ఈసారి మాత్రం ఆ సంప్రదాయం కనిపించడం లేదన్న విమర్శలు వినిపిస్తున్నాయి.
కమిటీ లేకుండానే బ్రహ్మోత్సవాల ఏర్పాట్లు
ప్రస్తుతం జాతర ఏర్పాట్లు కొనసాగుతున్నప్పటికీ ఉత్సవ కమిటీ చైర్మన్ నియామకంపై అధికారిక ప్రకటన వెలువడలేదు. కమిటీ లేకుండా ఏర్పాట్లు ఎవరి ఆధ్వర్యంలో జరుగుతున్నాయన్న ప్రశ్నలు ఉత్పన్నమవుతున్నాయి. ఆర్థిక వ్యవహారాలు, కాంట్రాక్టులు, స్టాళ్ల కేటాయింపులు, తాత్కాలిక నిర్మాణాలపై నిర్ణయాలు ఎలా తీసుకుంటున్నారన్నది స్పష్టంగా తెలియడం లేదని గ్రామస్తులు చెబుతున్నారు. ఉత్సవ కమిటీ లేకపోవడంతో నిర్వహణలో పారదర్శకత దెబ్బతింటుందనే అభిప్రాయం వ్యక్తమవుతోంది. గతంలో కమిటీ సమక్షంలోనే పనులు జరిగేవి. ఈసారి మాత్రం ఆ ప్రక్రియ కనిపించకపోవడంతో అనుమానాలు వ్యక్తమవుతున్నాయి.
జాతర దగ్గరపడినా చైర్మన్ నియామకం లేదు
జాతర తేదీలు సమీపిస్తున్నప్పటికీ చైర్మన్ నియామకం జరగకపోవడం ఆశ్చర్యం కలిగిస్తోంది. భక్తుల రద్దీ భారీగా ఉండే ఈ జాతరలో భద్రత, పారిశుద్ధ్యం, ట్రాఫిక్ నియంత్రణ, తాగునీరు, వైద్య సదుపాయాలు వంటి అంశాల్లో సమన్వయం అత్యంత కీలకం. కమిటీ లేకుండా ఈ సమన్వయం ఎలా సాధ్యమవుతుందన్న ప్రశ్నలు తలెత్తుతున్నాయి. గ్రామ పెద్దలు, భక్తులు తక్షణమే కమిటీని ఏర్పాటు చేసి బాధ్యతలను స్పష్టంగా కేటాయించాలని సూచిస్తున్నారు.
వర్గపోరే కారణమా?
గ్రామంలో నెలకొన్న వర్గపోరు కారణంగానే కమిటీ నియామకం ఆలస్యమైందా అనే చర్చ జోరందుకుంది. చైర్మన్ పదవిపై రెండు వర్గాల మధ్య ఏకాభిప్రాయం కుదరకపోవడంతో ప్రకటన వాయిదా పడిందని స్థానికంగా ప్రచారం సాగుతోంది. అధికారికంగా ఎలాంటి వివరణ రాకపోవడంతో సందేహాలు మరింత పెరుగుతున్నాయి. జాతర వంటి పెద్ద ఉత్సవంలో రాజకీయాలు దూరంగా ఉండాలని భక్తులు కోరుతున్నారు. కమిటీ నియామకంలో ఆలస్యం కొనసాగితే ఏర్పాట్లపై ప్రభావం పడే అవకాశముందని వారు హెచ్చరిస్తున్నారు. జాతర విజయవంతంగా నిర్వహించాలంటే ఆలయ అధికారులు, ప్రజాప్రతినిధులు, గ్రామస్థులు సమన్వయంతో ముందుకు సాగాల్సిన అవసరం ఉందని భక్తులు అంటున్నారు. ఉత్సవ కమిటీని తక్షణమే ప్రకటించి, పారదర్శకంగా బాధ్యతలు అప్పగిస్తే ఏర్పాట్లు సజావుగా సాగుతాయని వారు అభిప్రాయపడుతున్నారు. జాతర సమీపిస్తున్న తరుణంలో అనిశ్చితికి తెరదించి స్పష్టత ఇవ్వాలని గ్రామస్తులు డిమాండ్ చేస్తున్నారు. లేకపోతే భక్తుల్లో మరింత అయోమయం నెలకొనే ప్రమాదం ఉందని ఆందోళన వ్యక్తమవుతోంది.
