కాకతీయ, తెలంగాణ బ్యూరో: వినాయక చవితి రాగానే హైదరాబాద్, సికింద్రాబాద్ నగరాలు పండుగ వాతావరణంలో మునిగిపోతాయి. వీధులన్నీ గణపతి మండపాలతో కళకళలాడుతాయి. మార్కెట్లలో పూజా సామగ్రి కొనే జనం రద్దీగా కనిపిస్తారు. ఇళ్లలో పూజల కోసం చిన్న గణేశ విగ్రహాలను కూడా పెద్ద సంఖ్యలో కొనుగోలు చేస్తున్నారు.అయితే, సాధారణ రోజుల్లోనే ట్రాఫిక్ ఎక్కువగా ఉండే నగరంలో పండుగ సమయానికి రోడ్లు మరింత రద్దీగా మారుతాయి. దీనికి తోడు, వర్షం కూడా చేరితే పరిస్థితి ఇబ్బందిగా మారుతుంది.
బంగాళాఖాతంలో ఏర్పడిన అల్పపీడనం ప్రస్తుతం విశాఖపట్నం సమీపంలో కొనసాగుతోంది. ఇది క్రమంగా బలపడుతున్నందున తెలంగాణలో వర్షాలు కురిసే అవకాశం ఉంది.హైదరాబాద్‌లో ఇవాళ మధ్యాహ్నం 4 గంటల తర్వాత తేలికపాటి వానలు మొదలయ్యే సూచనలు ఉన్నాయి. సాయంత్రం 5 గంటల నుంచి వర్షం తీవ్రత పెరిగి మోస్తరుగా కురిసే అవకాశం ఉంది. ఈ వానలు రాత్రి 11 గంటల తర్వాత మరింత బలపడే అవకాశం ఉందని హైదరాబాద్ లోని వాతావరణ శాఖ తెలిపింది. రాత్రంతా తేలికపాటి నుండి మోస్తరుగా వాన కురుస్తూనే ఉంటుందని పేర్కొంది. రేపు ఉదయం 8 గంటల వరకు వర్షం కొనసాగే అవకాశం ఉన్నట్లు వాతావరణ శాఖ తెలిపింది.
పండుగ సందర్భంలో నగరంలోని చాలా ప్రాంతాల్లో మండపాలు ఏర్పాటు చేశారు. దాంతో రోడ్లు ఇరుకుగా మారే అవకాశం ఉంది. పోలీసులు కూడా కొన్ని రూట్లపై ట్రాఫిక్ ఆంక్షలు అమలు చేస్తున్నారు. ఈ పరిస్థితుల్లో వర్షం పడితే వాహనాల కదలిక మరింత నెమ్మదిగా ఉంటుంది.ఇక గత వారం కురిసిన వర్షాలతో ఇప్పటికే చాలా రోడ్లు దెబ్బతిన్నాయి. గుంతల కారణంగా వాహనదారులు ఇబ్బంది పడుతున్నారు. అందువల్ల పండుగ రోజున బయటకు వెళ్లే వారు ముందుగానే ప్లాన్ చేసుకోవడం మంచిది.
అవసరమైన పనులు సాయంత్రం ముందు ముగించుకోవడం మంచిది.
ట్రాఫిక్ ఎక్కువగా ఉండే ప్రాంతాలను తప్పించుకోవడం ఉత్తమం.
వర్షం సమయంలో రోడ్లు జారుడుగా మారే అవకాశం ఉన్నందున వాహనాలు జాగ్రత్తగా నడపాలి.
ఉరుములు, పిడుగులు పడే అవకాశం ఉండటంతో బహిరంగ ప్రదేశాల్లో ఎక్కువసేపు ఉండకపోవడం మంచిది.
ప్రతి సంవత్సరం వినాయక చవితి సమయానికి వర్షం కురవడం సాధారణమే. ఈసారి పండుగ కొంచెం ముందుగానే రావడంతో ఇంకా వర్షాకాలం కొనసాగుతోంది. అందువల్ల పండుగ రోజున వాన తప్పదనిపిస్తోంది. అయినప్పటికీ, భక్తులు గణపతి బప్పాకు ప్రత్యేక పూజలు చేసి పండుగను ఆనందంగా జరుపుకుంటారు.
