ఉత్తమ ఉద్యోగిగా సీఐ విశ్వేశ్వర్
గణతంత్ర దినోత్సవ వేడుకల్లో ఉత్తమ పురస్కారం ప్రదానం
ప్రజల భద్రతలో నిబద్ధ సేవలకు ప్రశంసలు
కాకతీయ / గీసుగొండ : విధి నిర్వహణలో అంకితభావంతో పనిచేస్తూ ఉత్తమ ప్రతిభ కనబరిచిన గీసుగొండ సర్కిల్ ఇన్స్పెక్టర్ *డి. విశ్వేశ్వర్*కు జిల్లా స్థాయి ఉత్తమ పురస్కారం లభించింది. 77వ గణతంత్ర దినోత్సవాన్ని పురస్కరించుకుని జిల్లా యంత్రాంగం ఆయన సేవలను గుర్తిస్తూ ఈ గౌరవాన్ని అందజేసింది. ప్రజల భద్రత, శాంతి భద్రతల పరిరక్షణలో చురుకైన పాత్ర పోషిస్తూ బాధ్యతాయుతంగా విధులు నిర్వహించినందుకు ఈ పురస్కారాన్ని ప్రదానం చేసినట్లు అధికారులు తెలిపారు. జిల్లా కలెక్టర్ సత్య శారద, ఈస్ట్ జోన్ డీసీపీ అంకిత్ కుమార్ చేతుల మీదుగా సీఐ విశ్వేశ్వర్కు ప్రశంసా పత్రం అందజేశారు. ఈ సందర్భంగా పలువురు అధికారులు ఆయన విధి నిర్వహణను అభినందించారు. క్రమశిక్షణతో కూడిన పోలీస్ సేవలు ప్రజల్లో విశ్వాసాన్ని పెంచుతాయని, అలాంటి అధికారులను ప్రోత్సహించడం అవసరమని పేర్కొన్నారు. కార్యక్రమంలో జిల్లా అదనపు కలెక్టర్ సంధ్యారాణి, పోలీస్ శాఖ ఉన్నతాధికారులు, వివిధ శాఖల అధికారులు పాల్గొని సీఐ విశ్వేశ్వర్కు శుభాకాంక్షలు తెలిపారు.
