చరిత్ర సృష్టించిన ఎలాన్ మస్క్

చరిత్ర సృష్టించిన ఎలాన్ మస్క్
ప్రపంచంలో తొలి 600 బిలియన్ డాలర్ల కుబేరుడు

కాక‌తీయ‌, నేష‌న‌ల్ డెస్క్ : ప్రపంచంలోనే అత్యంత ధనవంతుడు, టెస్లా అధినేత ఎలాన్ మస్క్ సరికొత్త చరిత్ర సృష్టించారు. ఫోర్బ్స్ తాజా నివేదిక ప్రకారం, మస్క్ నికర సంపద తొలిసారిగా 600 బిలియన్ డాలర్ల (సుమారు రూ.49 లక్షల కోట్లు) మైలురాయిని దాటింది. ఈ ఘనత సాధించిన ప్రపంచ తొలి వ్యక్తిగా మస్క్ రికార్డు నెలకొల్పారు. మస్క్ సంపద అమాంతం పెరగడానికి ప్రధాన కారణం ఆయన స్థాపించిన అంతరిక్ష పరిశోధన సంస్థ *స్పేస్‌ఎక్స్ పబ్లిక్ ఇష్యూ (ఐపీఓ)*కు రానుందన్న వార్తలే. స్పేస్‌ఎక్స్‌ను సుమారు 800 బిలియన్ డాలర్ల విలువతో పబ్లిక్‌కు తీసుకువచ్చే అవకాశాలు ఉన్నట్లు వచ్చిన నివేదికలతో ఒక్కరోజులోనే మస్క్ నికర సంపదకు 168 బిలియన్ డాలర్లు అదనంగా చేరినట్లు ఫోర్బ్స్ వెల్లడించింది.

టెస్లా షేర్ల బలం
టెస్లా కంపెనీలో మస్క్‌కు ఉన్న సుమారు 12 శాతం వాటా కూడా ఆయన సంపద పెరుగుదలకు తోడ్పడుతోంది. ఈ ఏడాది ఇప్పటివరకు టెస్లా షేర్లు 13 శాతం వరకు పెరగగా, సోమవారం ఒక్కరోజే షేరు ధర దాదాపు 4 శాతం పెరిగింది. స్పేస్‌ఎక్స్ ఐపీఓ గనుక 800 బిలియన్ డాలర్ల అంచనా విలువతో సాకారమైతే, ఎలాన్ మస్క్ ప్రపంచంలోనే తొలి *‘ట్రిలియనీర్’*గా అవతరించే అవకాశాలు ఉన్నాయని ఆర్థిక నిపుణులు అంచనా వేస్తున్నారు. ఫోర్బ్స్ ప్రకారం, ప్రస్తుతం స్పేస్‌ఎక్స్‌లో మస్క్‌కు ఉన్న 336 బిలియన్ డాలర్ల వాటానే ఆయనకు అత్యంత విలువైన ఆస్తిగా ఉంది.

ఐదేళ్లలో అసాధారణ వృద్ధి
గత ఐదేళ్లలో మస్క్ సంపద అద్భుతంగా పెరిగింది. మార్చి 2020: నికర సంపద $24.6 బిలియన్లు
జనవరి 2021: ప్రపంచంలోనే అత్యంత ధనవంతుడిగా అవతరణ ($190 బిలియన్లు)
సెప్టెంబర్ 2021: $300 బిలియన్ల క్లబ్‌లో చేరిన మూడో వ్యక్తి, తాజా ఘనతతో ఎలాన్ మస్క్ తన రికార్డులను తానే తిరగరాస్తూ, ప్రపంచ ఆర్థిక చరిత్రలో చెరగని ముద్ర వేశారు.