బ్రెజిల్ను అతలాకుతలం చేసిన తుఫాను
కూలిపోయిన స్టాట్యూ ఆఫ్ లిబర్టీ విగ్రహం
బ్రెజిలియా : బ్రెజిల్ను బలమైన తుఫాను అతలాకుతలం చేసింది. ముఖ్యంగా దక్షిణ బ్రెజిల్లోని రియో గ్రాండే డో సుల్ రాష్ట్రంలో గాలుల తీవ్రత అధికంగా నమోదైంది. గంటకు 90 కిలోమీటర్లకు పైగా వేగంతో వీచిన గాలులకు చెట్లు, విద్యుత్ స్తంభాలు నేలకూలాయి. మెట్రోపాలిటన్ ప్రాంతంలోని పోర్టో అలెగ్రే సమీపంలో ఉన్న గువైబా నగరంలో తీవ్ర ఘటన చోటుచేసుకుంది. అక్కడ ఏర్పాటు చేసిన స్టాట్యూ ఆఫ్ లిబర్టీ విగ్రహం ఒక్కసారిగా నేలకూలిపోయింది. దాదాపు 24 మీటర్ల ఎత్తు ఉన్న ఈ విగ్రహాన్ని ఓ హవాన్ రిటైల్ దుకాణానికి చెందిన పార్కింగ్ ప్రాంతంలో ఏర్పాటు చేశారు.
తుఫాను సమయంలో బలమైన గాలులకు విగ్రహం పూర్తిగా కూలి పార్కింగ్ ప్రదేశంలో పడిపోయింది. అయితే, ఆ సమయంలో అక్కడ ప్రజలు ఎవరూ లేకపోవడంతో పెద్ద ప్రమాదం తప్పినట్లు అధికారులు తెలిపారు. విగ్రహం కూలుతున్న దృశ్యాలు సోషల్ మీడియాలో వైరల్గా మారాయి. తుఫాను ప్రభావంతో మెట్రోపాలిటన్ ప్రాంతమంతా తీవ్ర వాతావరణ హెచ్చరికలు జారీ చేసినట్లు స్థానిక మీడియా పేర్కొంది. పరిస్థితిని దృష్టిలో ఉంచుకుని ప్రజలు అప్రమత్తంగా ఉండాలని అధికారులు సూచించారు.
