హన్మకొండ జిల్లా కలెక్టర్ స్నేహ శబరీష్
నామినేషన్ల స్వీకరణ ప్రక్రియ పరిశీలన
కాకతీయ, హనుమకొండ : హనుమకొండ జిల్లాలో రెండో విడత సర్పంచ్, వార్డు సభ్యుల ఎన్నికల నామినేషన్ల స్వీకరణ ప్రక్రియ ఆదివారం ప్రారంభమైన నేపథ్యంలో, జిల్లా కలెక్టర్ స్నేహ శబరీష్ హసన్పర్తి మండలంలోని సీతంపేట, నాగారం క్లస్టర్ గ్రామపంచాయతీ కార్యాలయాలను సందర్శించి నామినేషన్ స్వీకరణ కేంద్రాల్లో ఏర్పాటు చేసిన సదుపాయాలను సమీక్షించారు. సీతంపేట క్లస్టర్ నామినేషన్ కేంద్రంలో ఏయే గ్రామాల పరిధిలో సర్పంచ్, వార్డు స్థానాలకు నామినేషన్లు స్వీకరిస్తున్నారో వాటికి సంబంధించిన ఏర్పాట్లు, కౌంటర్ల లభ్యత, అభ్యర్థులకు అందించే సమాచారం వంటి అంశాలను కలెక్టర్ పరిశీలించారు. నామినేషన్ కేంద్రాల వద్ద ఓటర్ల జాబితాను తప్పనిసరిగా ప్రదర్శించాలని, హెల్ప్డెస్క్ ద్వారా అభ్యర్థులకు అవసరమైన సూచనలు అందించాలని ఆమె అధికారులకు ఆదేశించారు. ఆమెతో పాటు ఉన్న అధికారులు నాగారం క్లస్టర్ గ్రామపంచాయతీ కార్యాలయంలో ఏర్పాట్లను కూడా పరిశీలించారు. ఎన్నికల విధుల్లో పాల్గొనే అధికారులు, పంచాయతీ కార్యదర్శులు తగిన గుర్తింపు కార్డులు ధరించి, నిష్పక్షపాతంగా విధులు నిర్వహించాలని కలెక్టర్ సూచించారు. ఈ పరిశీలన కార్యక్రమంలో జెడ్పీ సీఈవో రవి, ఎంపీడీవో సుమనవాణి, తహసిల్దార్ కిరణ్కుమార్ తో పాటు ఇతర అధికారులు పాల్గొన్నారు. జిల్లా వ్యాప్తంగా నామినేషన్ల స్వీకరణ ప్రక్రియను పూర్తిస్థాయిలో, పారదర్శకంగా నిర్వహించాలనే దిశగా కలెక్టర్ సూచనలు జారీ చేశారు.
