ఆడిది ఈడ!.. ఈడిది ఆడ!!
మహిళా పోలీస్ స్టేషన్ల అడ్రస్‌ల్లో మహిమ!
వరంగల్ ఠాణా హన్మకొండలో
హన్మకొండ స్టేషన్ వరంగల్లో
వరంగల్ పోలీస్ కమిషనరేట్‌లో అధికారుల వింత వైఖ‌రి
కాకతీయ, వరంగల్ : ఆపదలో ఉన్న మహిళలు ధైర్యంగా పోలీసులను ఆశ్రయించాలి.. ఇదీ తెలంగాణ పోలీసుల కొటేషన్. తీరా వస్తే ఏముంది.. అడ్రస్ ల్లో మాయాజాలంతో వరంగల్, హన్మకొండ మహిళలు ఆందోళన చెందాల్సిన పరిస్థితులు నెలకొన్నాయి. అసలు మహిళలు పోలీస్ స్టేషన్ మెట్లెక్కుతున్నారంటే.. వారి అసహనం, ఓపిక ఎంత నశించి ఉంటాయో అర్థం చేసుకోవచ్చు. అలాంటి స్థితిలో తమ బాధను పోలీసులకు మొరపెట్టుకుందా మనుకునే వరంగల్, హన్మకొండ జిల్లాల మహిళలను వరంగల్ పోలీస్ కమిషనరేట్ మరింత పరీక్షకు గురి చేస్తోంది.
వరంగల్ నగరం.. పాత సెంట్రల్ జైలు ఎదుటి వైపు రంగంపేట ఏరియాలో ఒక మహిళా పోలీస్ స్టేషన్ ఉంది. ఈ విషయం అందరికీ తెలియకపోయినా.. స్థానికులకు, బాధితులకు, నిందితులకు తెలిసే ఉంటుంది. అయితే, ఈ పోలీస్ స్టేషన్ వరంగల్ ఏరియాకే చెందినదనుకుంటే.. కష్టాలు సంకెళ్లు తెరుచుకున్నట్టే? చావుకబురు సల్లగా చెప్పినట్టు.. ఈ పోలీస్ స్టేషన్ హన్మకొండది.. వరంగల్ పోలీస్ స్టేషన్ హన్మకొండలో ఉన్నదనే ఇక్కడి సిబ్బంది సమాధానంతో మహిళల ఆవేదనంతా మటుమాయమై పోతోంది. దీంతో పలువురు వరంగల్ మహిళలు.. హన్మకొండకు వెళ్లాలా? అని దిగులుతో ఆలోచనలో పడాల్సి వస్తోంది. అంత దూరమని ఊరుకుంటే.. వేధింపులకు గురికాకతప్పని పరిస్థితులు ఎదురవుతున్నాయని వాపోతున్నారు. మహిళలంటేనే భూదేవికి ఉన్నంత ఓపిక ఉంటుందంటారు.. అలాంటి ఓపికను వరంగల్ కమిషనరేట్ పోలీసులు.. ఈ విధంగా పరీక్షించడం విస్మయానికి గురి చేస్తోంది.
