కేంద్ర నిధులకోసమే పంచాయతీ ఎన్నికలు
బీజేపీ నేత బాస సత్యనారాయణ
కాకతీయ, కరీంనగర్ : పంచాయతీ ఎన్నికలు నిర్వహించడానికి నిజమైన కారణమే కేంద్రం నిధులని, గ్రామాల అభివృద్ధి కోసం కావాల్సిన నిధులు అందిస్తున్నది ప్రధానమంత్రి నరేంద్ర మోదీ ప్రభుత్వం మాత్రమేనని బీజేపీ రాష్ట్ర కార్యవర్గ సభ్యులు బాస సత్యనారాయణ అన్నారు. శుక్రవారం బీజేపీ మండల అధ్యక్షుడు సుగుర్తి జగదీశ్వరాచారి ఆధ్వర్యంలో మహాత్మా నగర్లో జరిగిన మీడియా సమావేశంలో ఆయన మాట్లాడారు.గ్రామాభివృద్ధికి కావాల్సిన ప్రతి రూపాయిని కేంద్రం పంపుతుందనీ, ప్రజల ఇళ్లలో వెలిగే ఉజ్వల గ్యాస్ కనెక్షన్ నుంచి రోడ్లు, వీధి లైట్లు, రేషన్ బియ్యం, ఉపాధి హామీ కింద 100 రోజుల పనులు వరకు అన్ని పథకాలు కేంద్ర ప్రభుత్వమే అందజేస్తోందని సత్యనారాయణ పేర్కొన్నారు. అంగన్వాడీ భవనాలు, పంచాయతీ కార్యాలయాలు, కందకాల తవ్వకాలు, ప్రతి గ్రామంలో జరుగుతున్న పనులకు నరేగా నిధులే బలమని చెప్పారు. ఎక్కడా లేని విధంగా బండి సంజయ్ ఎంపీ ల్యాడ్స్ నిధులతో గ్రామాల్లో కమ్యూనిటీ హాళ్లు, సీసీ రోడ్లు, హైమాస్ట్ లైట్లు, బోర్లు, డ్రైనేజీలు నిర్మించారని తెలిపారు. సీఎస్సార్ నిధులను సమీకరించి గ్రామాల్లోని ప్రభుత్వ పాఠశాలలు, ఆసుపత్రులకు అవసరమైన మౌలిక వసతులను కల్పించారని గుర్తు చేశారు. పదవ తరగతి విద్యార్థులకు 20 వేల సైకిళ్ల పంపిణీ, పరీక్షా ఫీజుల చెల్లింపులు, ‘మోదీ గిఫ్ట్’ పేరిట ప్రభుత్వ ఆసుపత్రులకు ఆధునిక వైద్య పరికరాలు సమకూర్చిన విషయాలను ఆయన వివరించారు. కాంగ్రెస్ ప్రభుత్వం రెండు ఏళ్ల పాలనలో గ్రామాల అభివృద్ధికి ఒక్క రూపాయి ఖర్చుచేసిందా? ఎమ్మెల్యేల దగ్గర ఊరిని బాగుచేయడానికి సొంత నిధులున్నాయా? గత ప్రభుత్వ కాలంలో నిధుల లేమితో సర్పంచులు పడిన ఇబ్బందులు, ఆత్మహత్యలకు వెళ్లిన సంఘటనలను ప్రజలు మరువకూడదని అన్నారు. గ్రామాల అభివృద్ధి కావాలంటే బీజేపీ బలపరిచిన అభ్యర్థులను గెలిపించాలని సత్యనారాయణ ప్రజలకు పిలుపునిచ్చారు. ఈ కార్యక్రమంలో జిల్లా అధికార ప్రతినిధి బొంతల కళ్యాణ్ చంద్ర, బిజెవైఎం రాష్ట్ర కార్యదర్శి చాడ అనితా రెడ్డి, జిల్లా ఈసి మెంబర్ బూట్ల శ్రీనివాస్, బిజెవైఎం జిల్లా అధ్యక్షుడు గడ్డం అరుణ్, బుర్ర శ్రీనివాస్, రామిడి మహేందర్ రెడ్డి, బండి స్వామి, ఉప్పునూటి సాగర్, జంగ సునీల్ రెడ్డి తదితరులు పాల్గొన్నారు.
