ఆస్తిపన్ను వసూళ్లలో అలసత్వం ఉండొద్దు
విలీన గ్రామాల్లో ఆస్తిప‌న్నుల‌ను స‌వ‌రించాలి
కమర్షియల్ మీట‌ర్ల ప్రాపర్టీలను ట్యాక్స్ కిందకు తీసుకురండి
కరీంనగర్ కమిషనర్ ప్రఫూల్ దేశాయ్
కాకతీయ, కరీంనగర్ : కరీంనగర్ నగరపాలక సంస్థ పరిధిలో ఆస్తిపన్నుల వసూళ్లను వంద శాతం పూర్తి చేయాలని కమిషనర్ ప్రఫూల్ దేశాయ్ అధికారులు ఆదేశించారు. శుక్రవారం ఎన్‌ఏసీ సమావేశ మందిరంలో రెవెన్యూ విభాగం ఆర్వీ ఏళ్ళు, ఆర్‌ఐలు, వార్డు అధికారులు, ఇంజనీరింగ్ విభాగం డీఈలు, ఏఈలతో సమీక్ష సమావేశం నిర్వహించారు.ఈ సందర్భంగా ఆయన మాట్లాడుతూ. ఆస్తిపన్ను వసూళ్లలో ఏ విధమైన అలసత్వం సహించబోమని స్పష్టం చేశారు. ప్రతి వార్డు ఆఫీసర్‌కు ఇవ్వబడిన లక్ష్యాల ప్రకారం వసూళ్లు జరగాలని తెలిపారు. మొండి బకాయిదారులు పన్నులు చెల్లించేందుకు చర్యలు తీసుకుని, వారం రోజుల్లో చెల్లించని వారికి నోటీసులు జారీ చేయాలని సూచించారు. పన్నులు చెల్లించడంలో నిర్లక్ష్యంగా వ్యవహరించే వారు ఉంటే వారి నల్లా కనెక్షన్లను తొలగించే వరకు చర్యలు తీసుకోవాలని ఆదేశించారు. ఈ ఆర్థిక సంవత్సరంలో ఎలాంటి బకాయిలు మిగలకుండా చూడాలని అన్నారు.
విలీన గ్రామాల్లో ఆస్తిప‌న్నుల‌ను స‌వ‌రించాలి
కొత్తగా విలీనం అయిన గ్రామాలతో పాటు 2019లో విలీనం చేసిన గ్రామాల డివిజన్లలో అండర్ అసెస్మెంట్లను ప్రాధాన్యతగా పూర్తి చేసి, ఆస్తిపన్నుల్లో ఉన్న తేడాలను సవరించాలని సూచించారు. ఫంక్షన్ హాల్స్, పెట్రోల్ బంకులు, కమర్షియల్ ప్రాపర్టీలతో సంబంధించి ఉన్న అండర్ అసెస్మెంట్లను పూర్తిచేసి ఆన్‌లైన్‌లో అప్డేట్ చేయాలని తెలిపారు. ముఖ్యంగా కమర్షియల్ ప్రాపర్టీల్లో భారీ బకాయిలు ఉన్నవారి పన్నులను తప్పనిసరిగా వసూలు చేయాలని ఆదేశించారు. ప్రభుత్వం కార్యాలయాలకు సంబంధించిన ఆస్తిపన్నులు కూడా వసూలు చేయాలని స్పష్టం చేశారు. 2021 నుంచి ఆర్వీఏల్‌,ఆర్‌ఐ లాగిన్‌ల్లో పెండింగ్‌లో ఉన్న సెల్ఫ్ అసెస్మెంట్లను రీ-వెరిఫికేషన్ చేసి వెంటనే క్లియర్ చేయాలని సూచించారు. నిర్మాణం లేకుండా ఉన్న చోట్ల హౌస్ నెంబర్లు కేటాయించినట్లయితే వాటిని గుర్తించి వెంటనే రద్దు చేయాలని అన్నారు.
ఆ ప్రాపర్టీలను కమర్షియల్ ట్యాక్స్ కిందకు తీసుకురండి
ఎన్‌పీడీసీఎల్ కమర్షియల్ మీటర్లు ఉన్న ప్రాపర్టీల పన్నులను కమర్షియల్ ట్యాక్స్ కిందకు మార్చాలని కమిషనర్ ఆదేశించారు. యూసేజ్ మార్చిన ప్రాపర్టీల అండర్ అసెస్మెంట్లను కూడా పూర్తి చేయాలని సూచించారు. ఇందిరమ్మ ఇళ్లు పొందిన లబ్ధిదారులకు సంబంధించిన గ్రౌండ్ వర్క్‌ను వేగవంతం చేసి నిర్మాణాలు ప్రారంభించేలా చర్యలు తీసుకోవాలని సిబ్బందికి కమిషనర్ సూచించారు. సమావేశంలో డిప్యూటీ కమిషనర్లు ఖాధర్ మొహియుద్దీన్, వేణుమాధవ్, అసిస్టెంట్ కమిషనర్ దిలీప్‌కుమార్, ఎంహెచ్‌ఓ సుమన్ తదితరులు పాల్గొన్నారు.
