జిల్లెళ్ల చెక్‌పోస్ట్‌లో ఎస్పీ మహేష్ బి.గితే ఆకస్మిక తనిఖీ
కాకతీయ, రాజన్న సిరిసిల్ల : గ్రామపంచాయతి ఎన్నికల నేపథ్యంలో తంగాలపల్లి పోలీస్ స్టేషన్ పరిధిలోని జిల్లెళ్ల చెక్‌పోస్ట్‌లో జిల్లా ఎస్పీ మహేష్ బి. గితే ఆకస్మిక తనిఖీ నిర్వహించారు. చెక్‌పోస్ట్ వద్ద వాహనాల తనిఖీ విధానాన్ని పరిశీలించడంతో పాటు నమోదు చేసిన రిజిస్టర్‌ను పరిశీలించారు. సిబ్బంది వాహనాలు తనిఖీ చేస్తున్న విధానాన్ని ప్రత్యక్షంగా అవగాహన చేసుకున్నారు.తనిఖీల సమయంలో పోలీసులు అప్రమత్తంగా వ్యవహరించి ప్రతి వాహనాన్ని క్షుణ్ణంగా తనిఖీ చేయాలని సూచించారు. అక్రమ నగదు, మద్యం రవాణాపై ప్రత్యేక నిఘా పెట్టాలని ఆదేశించారు. ఓటర్లను ప్రలోభపెట్టే ఉద్దేశంతో డబ్బు, మద్యం లేదా ఇతర విలువైన వస్తువులు తరలిస్తుండగా సమాచారం లభిస్తే వెంటనే పోలీసులకు తెలియజేయాలని ప్రజలకు సూచించారు. శాంతిభద్రతలకు భంగం కలిగించే ప్రయత్నాలు చేస్తే ఎన్నికల నియమావళి ప్రకారం కఠిన చర్యలు తప్పవని స్పష్టం చేశారు.ఈ తనిఖీలో సి.ఐ మొగిలి, చెక్‌పోస్ట్ సిబ్బంది పాల్గొన్నారు.
