ఏసీబీ వలకు చిక్కిన పెద్దవంగర ఎమ్మార్వో
మ్యూటేషన్కు లంచం డిమాండ్
ఆరు నెలలు తిరిగి విసుగు చెందిన రైతు
ఏసీబీ అధికారులకు ఫిర్యాదు చేయడంతో రెడ్హ్యాండెడ్గా పట్టివే
కాకతీయ, పెద్దవంగర : మహబూబాబాద్ జిల్లా పెద్దవంగర మండల తహసీల్దార్ కార్యాలయంలో శుక్రవారం అవినీతి నిరోధక శాఖ అధికారులు దాడులు నిర్వహించారు. ఓ రైతు నుంచి 15 వేలు లంచం తీసుకుంటుండగా ఏసీబీ అధికారులు రెడ్ హ్యాండెడ్ గా తహసీల్దార్ మహేందర్, డ్రైవర్ గౌతమ్ లను పట్టుకున్నారు. తహసీల్దార్ మహేందర్ ఓ రైతు భూమి మ్యూటేషన్ చేసేందుకు రూ.20 వేలు డిమాండ్ చేశాడు. అంత డబ్బులు నేను ఇవ్వలేనని రైతు వేడుకున్న వినలేదు. ఆరు నెలలుగా తిరిగి తిరిగి 15 వేలు ఇచ్చేందుకు రైతు ఎమ్మార్వోతో ఒప్పందం కుదుర్చుకున్నాడు. అనంతరం వరంగల్ ఏసీబీ అధికారులను కలిసి ఫిర్యాదు చేశాడు. ఏసీబీ అధికారులు సూచించిన విధంగా శుక్రవారం మహేందర్ ఎమ్మార్వోను కలవగా.. డ్రైవర్ గౌతమ్కు అందజేయాలని సూచించాడు. దీంతో రైతు డ్రైవర్కు అందజేస్తుండగా ఏసీబీ అధికారులు అదుపులోకి తీసుకున్నాడు. లంచం తీసుకోవడం ద్వారా తహసీల్దార్ మహేందర్, డ్రైవర్ గౌతమ్ తమ విధులను అక్రమంగా నిర్వహించి అనుచిత లాభం పొందేందుకు ప్రయత్నించినట్లుగా పేర్కొంటూ ఏసీబీ అధికారులు పేర్కొన్నారు. అనంతరం వారి ఇద్దరిని అరెస్ట్ చేసి అదుపులో తీసుకున్నట్లు తెలిపారు. కేసు దర్యాప్తులో ఉన్నందున ఫిర్యాదుదారుని వివరాలు.. భద్రత రీత్య వెల్లడించడం లేదని ఏసీబీ అధికారులు తెలిపారు. ఎవరైనా ప్రభుత్వ ఉద్యోగి లంచం డిమాండ్ చేసిన పక్షంలో, ప్రజలు ఎసిబి టోల్ ఫ్రీ నంబర్ 1064 కు ఫిర్యాదు చేయాలని ఎసిబి విజ్ఞప్తి చేసింది. వాట్సాప్ (9440446106), ఫేస్బుక్, ట్విట్టర్ ద్వారా కూడా సంప్రదించవచ్చన్నారు. ఫిర్యాదుదారుల వివరాలను రహస్యంగా ఉంచుతామని ఏసీబీ స్పష్టం చేసింది.
