గ్రీన్ కార్డ్ హోల్డర్లకు బిగ్ షాక్.. రీ-వెరిఫికేషన్‌కు ట్రంప్ ఆదేశం!
వైట్‌హౌస్ కాల్పుల తర్వాత ట్రంప్ కఠిన చర్యలు
19 దేశాల వలసదారులపై ప్రత్యేక సమీక్ష
అమెరికాలో గ్రీన్ కార్డ్ హోల్డర్లకు కఠిన పరీక్షలు
కాకతీయ, ఇంట‌ర్నేష‌న‌ల్ : ఈ నెలలో వైట్‌హౌస్ సమీపంలో ఆఫ్ఘ‌న్ వలసదారుడు రహ్మానుల్లా లకన్‌వాల్ చేసిన కాల్పుల ఘటన అమెరికా మొత్తం దృష్టిని ఆకర్షించింది. ఈ దారుణ ఘటనలో ఇద్దరు నేషనల్ గార్డ్ సైనికులు తీవ్రంగా గాయపడ్డారు, వీరిలో సారా బెక్‌స్ట్రామ్ అనే సైనికురాలు చికిత్స పొందుతూ మృతి చెందారు. ఈ ఘటన తర్వాత అధ్యక్షుడు డొనాల్డ్ ట్రంప్ ఇమ్మిగ్రేషన్ విధానాలపై కఠిన నిర్ణయం తీసుకుంటూ గ్రీన్ కార్డ్ హోల్డర్లకు బిగ్ షాక్ ఇచ్చారు.
ప్రధానంగా ఆఫ్ఘనిస్థాన్‌తో పాటు మయన్మార్, ఇరాన్, లిబియా, సోమాలియా, యెమెన్, వెనిజులా వంటి 19 దేశాల గ్రీన్ కార్డ్ హోల్డర్లపై ప్రత్యేక రివ్యూ జరుపాలని ట్రంప్ ఆదేశించారు. ఇప్పటికే ఆఫ్ఘనిస్థాన్ నుంచి వలస దరఖాస్తులను నిలిపివేసిన అమెరికా సర్కార్, ఈ 19 దేశాల వలసదారుల డేటాను క్షుణ్ణంగా పునఃపరిశీలించ‌నుంది.
అమెరికా కస్టమ్స్ అండ్‌ ఇమ్మిగ్రేషన్ సర్వీసెస్ (USCIS) డైరెక్టర్ జోసెఫ్ ఎడ్లో మాట్లాడుతూ.. “ఆందోళనకర దేశాల నుండి వచ్చిన ప్రతి వలసదారుడి గ్రీన్ కార్డును కఠినంగా రీ-వెరిఫికేషన్ చేయాలని అధ్యక్షుడు ఆదేశించారు. ఇది దాదాపు లక్షలాది గ్రీన్ కార్డ్ హోల్డర్లపై ప్రభావం చూపుతుంది.” అని పేర్కొన్నారు. గత బైడెన్ ప్రభుత్వం వలసదారుల స్క్రీనింగ్ ప్రక్రియలో సడలింపు చూపింది. ఆ కారణంగానే ఇలాంటి భయంకరమైన ఘటనలు చోటు చేసుకుంటున్నాయ‌ని ఎడ్లో విమ‌ర్శించారు. నిందితుడు లకన్‌వాల్, గతంలో ఆఫ్ఘనిస్థాన్‌లో సీఐఏతో కలిసి పనిచేశాడని, తాలిబన్ల నుండి రక్షణ కల్పించే ప్రత్యేక కార్యక్రమం కింద అమెరికాకు వచ్చాడని USCIS వెల్లడించింది.
ఇమ్మిగ్రేషన్ రివ్యూ ప్రక్రియలో, ఈ 19 దేశాల వలసదారుల దేశ నేపథ్యాన్ని ప్రతికూల అంశంగా పరిగణిస్తారు. కాబట్టి, వీసా, గ్రీన్ కార్డ్ దరఖాస్తులు ముందునుండి కఠినతరంగా పరిశీలించబడతాయి. ఈ కొత్త మార్గదర్శకాలు, భద్రతా సమస్యల్ని అంచనా వేయడంలో సహాయపడతాయి. కాగా, ట్రంప్ సర్కార్ తీసుకుంటున్న ఈ కఠిన చర్యలు, అమెరికాలోని భద్రతా పరిస్థితులను దృష్టిలో ఉంచుకుని తీసుకున్నదే అయినా..ఈ నిర్ణయం లక్షలాది వలసదారులపై ప్రభావం చూపే అవకాశం ఉంది
