వడ్లకు మద్దతు ధర కోరుతూ రైతులు రోడ్డుపై ధర్నా
గంటలపాటు నిలిచిన వాహనాలు పోలీసుల జోక్యంతో పరిస్థితి సాధారణం
కాకతీయ,మానకొండూరు కరీంనగర్: కరీంనగర్ జిల్లా మానకొండూరు వ్యవసాయ మార్కెట్ కమిటీ ఎదుట శుక్రవారం రైతులు భారీ స్థాయిలో ఆందోళనకు దిగారు. వడ్లకు ప్రభుత్వం తగిన మద్దతు ధర ప్రకటించకపోవడం, కొనుగోలు కేంద్రాలు సక్రమంగా పనిచేయకపోవడం వల్ల నష్టాలు చవిచూస్తున్నామని రైతులు తీవ్ర ఆవేదన వ్యక్తం చేశారు.
రైతులు రోడ్డుపై బైఠాయించి ధర్నా చేపట్టడంతో రోడ్డు రవాణా పూర్తిగా స్తంభించింది. ఇరువైపులా వందలాది వాహనాలు నిలిచిపోవడంతో ప్రయాణికులు తీవ్ర ఇబ్బందులు ఎదుర్కొన్నారు. పరిస్థితి ఉద్రిక్తంగా మారుతుందనే సమాచారం అందుకున్న పోలీసు బృందాలు వెంటనే అక్కడికి చేరుకుని రైతులతో మాట్లాడారు.రైతుల డిమాండ్లను ఉన్నతాధికారులకు నివేదిస్తామని పోలీసు అధికారులు హామీ ఇవ్వడంతో ఆందోళనలో ఉన్న రైతులు కొంతసేపటికి ధర్నా విరమించారు.
అయితే, తక్షణమే వడ్లకు సరైన మద్దతు ధర ప్రకటించకపోతే తమ పోరాటాన్ని తీవ్రతరం చేస్తామని రైతులు స్పష్టం చేశారు.
