భారత్తో నేపాల్ కయ్యం.. వివాదాస్పదంగా రూ. 100 నోటు!
మళ్లీ రగిలిన సరిహద్దు వివాదం
నేపాల్ వివాదాస్పద నోటుపై భారత్ తీవ్ర ఆగ్రహం
రెండు దేశాల మధ్య ఉద్రిక్తతలు
కాకతీయ, నేషనల్ డెస్క్ : నేపాల్ మరోసారి వివాదాల దారిలోకి దూసుకెళ్లింది. భారత భూభాగాన్ని తమదిగా చూపించే మ్యాప్తో కూడిన కొత్త రూ.100 నోటును చలామణిలోకి తెచ్చి, ఇరు దేశాల మధ్య నెలకొన్న సరిహద్దు ఉద్రిక్తతలను మళ్లీ పెంచింది. లిపులేఖ్, లింపియాధుర, కాలాపానీ ప్రాంతాలను స్పష్టంగా తమ భూభాగంగా గుర్తిస్తూ రూపొందించిన ఈ నోటు, గతంలోనే చర్చలకు దారి తీసింది. అయితే ఈసారి దానిని అధికారికంగా విడుదల చేసి భారత్తో కయ్యానికి కాలు దువ్వుతోంది.
కొత్త నోటులో వివాదాస్పద మ్యాప్ కనిపించడంతో భారత్ వెంటనే ప్రతిస్పందించింది. “ఇలాంటి ఏకపక్ష నిర్ణయాలతో భౌగోళిక వాస్తవాలు మారవు’’ అని భారత విదేశాంగ శాఖ తెలిపారు. ప్రస్తుతం ఇరు దేశాల మధ్య సరిహద్దు చర్చలు జరుగుతున్నందున, ఈ సమయంలో నేపాల్ ఇలాంటి నిర్ణయం తీసుకోవడం బాధాకరమని పేర్కొంది. సంబంధాలను క్షీణింపజేసే చర్యలుగా ఈ విషయాన్ని భారత్ చూస్తోంది.
ఇది మొదటిసారి కాదు. నేపాల్ గతంలోనే ఈ వివాదాస్పద మ్యాప్ను ఆమోదించి, భారత్కు ఆందోళన కలిగించింది. కృత్రిమంగా భూభాగాలను విస్తరించుకునే ప్రయత్నాలు అంగీకారయోగ్యం కావు, ఈ ప్రాంతాలు భారతదేశానికి చెందినవేనని అప్పట్లో న్యూఢిల్లీ స్పష్టమైన హెచ్చరికలు జారీ చేసింది. అయినప్పటికీ ఈ ఏడాది మేలో నేపాల్ కేబినెట్ రూ.100 నోటు ముద్రణకు గ్రీన్సిగ్నల్ ఇచ్చింది. తాజాగా దానిని విడుదల చేయడంతో వివాదం మళ్లీ ముదురింది.
ఈ కొత్త నోటు చలామణిలోకి వచ్చిన వెంటనే సోషల్ మీడియాలో హాట్టాపిక్గా మారింది. ప్రజల్లోనూ, నిపుణుల్లోనూ చర్చలు మొదలయ్యాయి. ఈ నిర్ణయం వెనుక నేపాల్ అసలు ఉద్దేశ్యం ఏమిటి? సరిహద్దు చర్చలు సాగుతున్నప్పుడు ఇలాంటి టోన్ ఎందుకు? దేశీయ రాజకీయాల్లో జాతీయత్వ జ్వాల పెంచడానికినా? లేక భారత్పై ఒత్తిడి చూపించడానికా? ఏ కారణం అయినా, ఈ నోటు విడుదలతో ఇరు దేశాల మధ్య వాతావరణం వేడెక్కే అవకాశాలు స్పష్టంగా కనిపిస్తున్నాయి.
