హాంకాంగ్లో అగ్ని తుఫాన్.. 44 మంది మృతి, వందల మంది గల్లంతు!
హాంకాంగ్ తై పో జిల్లాలో సంభవించిన అగ్ని ప్రళయం
13 గంటలు గడిచినా ఆగని మంటలు
ప్రమాదంలో 4,600 మంది ప్రాణాలు
కాకతీయ, ఇంటర్నేషనల్ : హాంకాంగ్ తై పో జిల్లాలో సంభవించిన అగ్ని తుఫాన్ ప్రపంచాన్నే కుదిపేసింది. వాంగ్ ఫు కోర్ట్ అనే మెగా హౌసింగ్ ఎస్టేట్ను అగ్నికీలలు చుట్టుముట్టడంతో పరిస్థితి పూర్తిగా అదుపుతప్పింది. 44 మంది అక్కడికక్కడే మృతిచెందగా… 279 మంది ఆచూకీ తెలియని పరిస్థితి నెలకొంది. భవనం నుంచి బయటికొచ్చేందుకు వీలుకాక, దట్టమైన పొగలో చిక్కుకున్న కుటుంబాలు సహాయం కోసం చేసిన ఆర్తనాదాలు శిలా మయమైపోయాయి.
మధ్యాహ్నం 2:51 గంటలకు మొదలైన మంటలు ఒక్కసారి కాదు… గంటల తరబడి ఉధృతమవుతూనే ఉన్నాయి. ఇప్పటివరకు 13 గంటలు గడిచినా అగ్నిమాపక సిబ్బంది నియంత్రించలేకపోవడం పరిస్థితి ఎంత దారుణంగా ఉందో చెబుతోంది. 700 మందికి పైగా ఫైర్మెన్లు యుద్ధ ప్రాతిపదికన ప్రయత్నిస్తున్నప్పటికీ… మంటల ఉధృతి ఒక్కసారిగా పెరిగిపోవడంతో ఆపరేషన్ మరింత క్లిష్టమైంది.
వాంగ్ ఫు కోర్ట్లో మొత్తం ఎనిమిది భారీ బ్లాక్స్ ఉన్నాయి. వీటిలో దాదాపు 4,600 మంది నివసిస్తున్నారు. పెరిగిన జనసాంద్రత, భవనాల మధ్య తక్కువ గ్యాప్ కారణంగా అగ్నికీలలు ఒక్క భవనంతో ఆగకుండా మిగతా బ్లాక్స్కు వేగంగా వ్యాపించాయి. పలువురు కుటుంబాలు తక్షణమే బయటకు రావడానికి వీలు లేక భవనాల్లోనే చిక్కుకుపోయారని అధికారులు అంచనా వేస్తున్నారు. ప్రాణాలను పణంగా పెట్టి ప్రజలను రక్షించేందుకు వచ్చిన ఫైర్ఫోర్స్లో ఒకరు మంటల్లో గాయపడి మృతి చెందారు. మరొకరు తీవ్రమైన గాయాలతో ఆస్పత్రిలో చికిత్స పొందుతున్నారు.
మిగతా సిబ్బంది నిరంతరం మంటలను అదుపుచేసేందుకు పోరాడుతున్నా.. మంటలు మరింత ఉధృతంగా వ్యాపించడం వారి పనిని ఇంకా కష్టతరం చేసింది. అధికారులు ఈ ఘటనను ‘లెవల్ ఫైవ్’గా ప్రకటించారు. ఇది హాంకాంగ్లో అగ్నిప్రమాదాలకు ఉన్న అత్యున్నత హెచ్చరిక స్థాయి. ప్రమాద స్థితిని బట్టి పోలీసులు తక్షణమే వెయ్యి మందికి పైగా ప్రజలను అక్కడి నుంచి ఖాళీ చేయించారు. సమీప రోడ్లు మూసివేయడంతో పాటు 30కి పైగా బస్సు రూట్లను మార్గం మార్చారు.
భవనాల వెలుపల మరమ్మతుల కోసం వేసిన వెదురు బొంగులు మంటలు వేగంగా వ్యాపించడానికి ప్రధాన కారణమని అధికారులు అనుమానిస్తున్నారు. చిన్న చెలరేగిన అగ్ని, బొంగుల సహాయంతో నిమిషాల్లోనే పెద్ద ప్రమాదంగా మారిపోయిందని నివేదికలు చెబుతున్నాయి. ఈ కాంప్లెక్స్ సముద్ర తీరం మరియు ప్రధాన రహదారికి చాలా దగ్గర్లో ఉంది. కేవలం 500 మీటర్ల దూరంలో తై పో రైల్వే స్టేషన్ ఉండటంతో… అత్యవసర సేవల వాహనాలు పెద్ద సంఖ్యలో అక్కడికి చేరాయి. అయితే, దట్టమైన పొగ, మంటల వలయం కారణంగా భవనాల్లోకి ప్రవేశించడం అత్యంత ప్రమాదకరంగా మారింది. అగ్నిమాపక సిబ్బంది రక్షణ చర్యలను వేగవంతం చేసినా… ఇప్పటికీ వందలాది మంది నివాసితులు కనిపించకపోవడం హాంకాంగ్ మొత్తాన్నీ ఆందోళనలోకి నెట్టింది.
