పేల్చివేతా..? కూల్చివేతా..?

పేల్చివేతా..? కూల్చివేతా..?
అధికార, ప్ర‌తిప‌క్ష పార్టీ ప్ర‌చార అస్త్రంగా త‌నుగుల‌ చెక్‌డ్యాం
నాణ్య‌త లేని నిర్మాణం అంటున్న కాంగ్రెస్‌
ఇసుక మాఫీయా ప‌నే అంటున్న బీఆర్ఎస్‌
కొన‌సాగుతున్న పోలీసుల ద‌ర్యాప్తు.. ఇప్ప‌టికే ఫోరెన్సిక్ ల్యాబ్ టెస్టుకు ఆన‌వాళ్లు
ఉత్కంఠ‌గా గుంపుల చెక్ డ్యాంపై ఇన్విస్టిగేష‌న్ రిపోర్టు

కాక‌తీయ‌, క‌రీంన‌గ‌ర్ బ్యూరో : క‌రీంన‌గ‌ర్ జిల్లా జ‌మ్మికుంట మండ‌లం త‌నుగుల గ్రామం మానేరు న‌ది పై నిర్మించిన చెక్ డ్యాం కూల్చివేత రోజు రోజుకు అధికార, ప్ర‌తిప‌క్ష పార్టీల‌కు ఆరోప‌ణ ప్ర‌తి ఆరోప‌ణ‌లకు కేంద్ర బిందువుగా మారుతోంది. నాణ్య‌త‌, భ‌ద్ర‌త ప్ర‌మాణాలు పాటించ‌కుండా నిర్మాణాలు జ‌ర‌ప‌డంతోనే చెక్ డ్యాంలు కూలిపోతున్నాయ‌ని అధికార పార్టీ నాయ‌కులు ఒక వైపు ఆరోప‌ణ‌లు చేస్తూ స‌వాల్ విసురుతుంటే మ‌రో వైపు ప్ర‌తి ప‌క్ష బీఆర్ఎస్ పార్టీ నాయ‌కులు మాత్రం అధికార పార్టీ అండ‌దండ‌ల‌తో చెల‌రెగిపోతున్న ఇసుక మాఫియానే అక్ర‌మ ఇసుక త‌వ్వకాల‌కు అడ్డుగా ఉంద‌ని త‌నుగుల చెక్ డ్యాం ను బాంబులతో రాత్రికి రాత్రే కూల్చివేశార‌ని ప్ర‌తిఆరోప‌ణ‌లు విసురుతున్నారు.

అధికార, ప్ర‌తిప‌క్ష పార్టీ ప్ర‌చార అస్త్రంగా త‌నుగుల చెక్‌డ్యాం

కరీంనగర్ జిల్లా జమ్మికుంట మండలం తనుగుల గ్రామంలోని మానేరు నది పై నిర్మించిన చెక్ డ్యాం కూల్చివేత పంచాయతీ ఎన్నికల ముందు రాజకీయ వ‌ర్గాల్లో హాట్‌టాపిక్‌గా మారింది. ఓ వైపు అధికార పార్టీ, మరో వైపు ప్రతిపక్ష బీఆర్ఎస్ నేతలు ఈ ఘటనను ఎన్నికల ప్ర‌చార అస్త్రంగా మార్చుకుంటున్నాయి. ప్రతిపక్ష నేతలు చెక్ డ్యాం రాత్రి రాత్రే బాంబుల ద్వారా ధ్వంసం చేయబడిందని ఇసుక మాఫియాకు అడ్డుగా నిలిచిన డ్యాం అధికార పార్టీ నాయ‌కుల అండ‌దండ‌లతో కూల్చివేయబడి ప్రజలకు నష్టం జరిగిందని ఆరోపిస్తున్నారు. అదే సమయంలో అధికార పార్టీ నేతలు కూల్చివేతకు కారణం ప్రతిపక్షం నాణ్యత, భద్రతా ప్రమాణాలను పాటించకుండా నిర్మాణాలను చేపట్టడమేనని అసత్య ప్రచారాలు ద్వారా వాస్తవాన్ని మసకబారుస్తున్నారని విమర్శ చేస్తున్నారు. కరీంనగర్ నుంచి మంథని ముత్తారం వరకు రూ. కోట్లతో నిర్మించిన ఎనిమిది చెక్ డ్యాములు కూలీపోతున్నాయ‌ని గతంలో 2009, 2014లో నిర్మించిన చెక్ డ్యామ్‌లు ఎన్ని వరదలు వచ్చినా నిలిచి ఉన్నాయంటూ 9 ఏళ్ల బీఆర్ఎస్ పాలనలో కొత్త నిర్మాణాలు కూలిపోవడం వంటి అంశాల‌ను కాంగ్రెస్ నాయ‌కులు ఎన్నిక‌ల వ్యూహంగా వాడుతున్నారు.

కొన‌సాగుతున్న ద‌ర్యాప్తు..

మానేరు వాగుపై నిర్మించిన చెక్ డ్యామ్ దెబ్బతిన్న ఘటనపై జిల్లా యంత్రాంగం, పోలీస్ శాఖ సీరియస్ గా తీసుకుంది. ఈ ఘటన నవంబర్ 21వ రాత్రి చోటు చేసుకున్న సంగతి తెలిసిందే. అయితే ఇది సహజంగా జరిగిందా లేక ఎవరైనా ఉద్దేశపూర్వకంగా విధ్వంసానికి పాల్పడ్డారా అనే అనుమానాలు వ్యాప్తి చెందుతున్న నేపథ్యంలో జమ్మికుంట పోలీస్ స్టేషన్‌లో కేసు నమోదు చేసి సమగ్ర దర్యాప్తు కొన‌సాగిస్తున్నారు. ఇప్ప‌డికే కరీంనగర్ జిల్లా కలెక్టర్ పమేలా సత్పతి, పోలీస్ కమిషనర్ గౌస్ ఆలం సంఘటనా స్థలాన్ని పరిశీలించి పరిస్థితిని సమీక్షించారు. ఘటనా స్థల పరిశీలనలో భాగంగా హైదరాబాద్ నుండి ఫోరెన్సిక్ ల్యాబ్ అసిస్టెంట్ డైరెక్టర్ వెంకట్ రాజ్ నేతృత్వంలోని బృందం, కరీంనగర్ క్లూస్ టీం సభ్యులు, ఫింగర్ ప్రింట్ ఇన్స్పెక్టర్లు రాజు, స్వర్ణజ్యోతి చెక్ డ్యాం వ‌ద్ద‌ క్షుణ్ణంగా తనిఖీలు నిర్వహించారు. ఈ ఘటనకు అసలు కారణాలను వెలికితీయడానికి పూర్తి స్థాయి దర్యాప్తు జ‌రుగుతుండ‌గా అక్కడి నుండి సేకరించిన నమూనాలను ప్రయోగశాలలో పరీక్షించి సమగ్ర నివేదిక వచ్చిన తర్వాతే పేల్చివేశారా..? కూల్చివేశారా..? అనేది బ‌య‌ట‌ప‌డ‌నుండ‌గా వ‌చ్చిన నివేదిక అధారంగానే తగిన చర్యలు తీసుకుంటాము అని పోలీస్ శాఖ చేపుతుంది.