హెచ్‌పీలో భారీగా లేఆఫ్స్.. ఏఐ ఎఫెక్టేనా..?
హెచ్‌పీ లేఆఫ్స్ కలకలం
ఏఐ ధాటికి 6 వేల ఉద్యోగులకు షాక్‌
ప్రొడక్ట్ డెవలప్‌మెంట్‌, ఆపరేషన్స్‌, కస్టమర్ సపోర్ట్‌పై కోతలు
కాకతీయ, బిజినెస్ : ప్రపంచ ఐటీ రంగంలో లేఆఫ్స్ పర్వం ఆగే ఆలోచనలో కనిపించడం లేదు. ఒకప్పుడు కోవిడ్‌ మాంద్యం పేరుతో ప్రారంభమైన ఉద్యోగ కోతలు, ఇప్పుడు కృత్రిమ మేధ (ఏఐ) ఆధారిత మార్పుల వైపు దూసుకెళ్తున్నాయి. మరో టెక్ దిగ్గజం హెచ్‌పీ (HP) కూడా ఇదే దారి పట్టింది. సంస్థ తాజాగా ప్రపంచవ్యాప్తంగా భారీగా ఉద్యోగులను తొలగించనున్నట్లు ప్రకటించడంతో టెక్ వర్గాల్లో కలకలం రేగింది.
రాబోయే రెండు నుంచి మూడు ఏళ్లలో సుమారు 6,000 మంది ఉద్యోగులకు గుడ్‌బై చెప్ప‌బోతున్న‌ట్లు హెచ్‌పీ అఫీషియ‌ల్‌గా అనౌన్స్ చేసింది. 2028 ఆర్థిక సంవత్సరం నాటికి మొత్తం 4,000 నుంచి 6,000 వరకు ఉద్యోగులను తగ్గించాలని సంస్థ లక్ష్యంగా పెట్టుకుంది. ఈ సంఖ్య, ప్రస్తుతం ఉన్న సిబ్బందిలో దాదాపు 10 శాతం. అంటే, ప్రతి పది మంది ఉద్యోగుల్లో ఒకరి ఉద్యోగం మాయమవుతుందన్న మాట.
సంస్థ యాజమాన్యం ఈ నిర్ణయానికి ప్రధాన కారణం కృత్రిమ మేధ విస్తృతి అని స్పష్టం చేసింది. ప్రొడక్ట్ డెవలప్‌మెంట్‌, ఇంటర్నల్ ఆపరేషన్స్‌, కస్టమర్ సపోర్ట్‌ వంటి కీలక విభాగాల్లో ఏఐ ఆధారిత టూల్స్, ఆటోమేషన్‌ వినియోగాన్ని పెంచాలని హెచ్‌పీ భావిస్తోంది. ఈ మార్పులు అమలు చేయడానికి సిబ్బంది సంఖ్యను క్రమబద్ధీకరించడం తప్పనిసరి అవుతోందని కంపెనీ సీఈఓ ఎన్రిక్ లారెస్ పేర్కొన్నారు. 2024 అక్టోబరు నాటికి హెచ్‌పీకి ప్రపంచవ్యాప్తంగా దాదాపు 58,000 మంది ఉద్యోగులు ఉన్నారు. అయితే, కొత్త నిర్ణయంతో ఈ సంఖ్య గణనీయంగా పడిపోనుంది. విశేషం ఏమిటంటే, ఈ ఏడాది ఆరంభంలోనే హెచ్‌పీ 1,000-2,000 మంది ఉద్యోగులను తొలగించింది. ఇప్పుడు మళ్లీ కొత్త రౌండ్ లేఆఫ్స్ ప్రకటించడంతో ఉద్యోగుల్లో ఆందోళన పెరిగింది.
గూగుల్‌, మెటా, అమెజాన్‌, ఇన్ఫోసిస్‌ వంటి ప్రపంచ ప్రముఖ సంస్థలు ఇప్పటికే వేలాది మందిని ఉద్యోగాల నుంచి తొలగించాయి. ఏఐ ట్రెండ్ వేగంగా విస్తరిస్తుండటంతో టెక్ కంపెనీలు భారీ పెట్టుబడులు పెట్టడం, తమ ఆపరేషన్లను పూర్తిగా పునర్వ్యవస్థీకరిస్తుండటం గమనార్హం. ఈ నేపథ్యంలో హెచ్‌పీ నిర్ణయం కూడా ఏఐ రివల్యూషన్‌ భాగమనే చెప్పాలి. హెచ్‌పీ ఉద్యోగులకు ఇది పెద్ద షాక్‌ అయినప్పటికీ, టెక్ ప్రపంచం మళ్లీ ఒక ముఖ్యమైన మలుపు దిశగా సాగుతోందని విశ్లేషకులు భావిస్తున్నారు. ఏఐ ప్రవేశం మరింత వేగవంతం అవుతున్నందున వచ్చే నెలల్లో ఇంకా ఎన్నో సంస్థలు ఇలాంటి నిర్ణయాలు తీసుకునే అవకాశం ఉందని రంగ నిపుణుల అంచనా.
