2008 ముంబై ఉగ్రదాడికి 17 ఏళ్లు: ‘నెవర్ఎవర్’ అంటూ దేశం నివాళులు
లష్కరే దాడులకు 17 ఏళ్లు
నెవర్ఎవర్ థీమ్తో గేట్వే వద్ద ప్రత్యేక కార్యక్రమం
విద్యార్థులతో శాంతి – జాతీయ భద్రత ప్రతిజ్ఞ
కాకతీయ, నేషనల్ డెస్క్ : భారత్ ఆర్థిక రాజధాని ముంబైపై పాకిస్థాన్ ప్రేరేపిత లష్కరే తోయిబా ఉగ్రవాదులు చేసిన దారుణ దాడికి నేటితో 17 ఏళ్లు పూర్తయ్యాయి. 2008 నవంబర్ 26న లష్కరే తోయిబా ముష్కరులు ముంబైను రక్తపాతం మయం చేసిన ఆ భయానక రాత్రిని దేశం ఇంకా మరువలేదు. అమాయక ప్రజల రక్తంతో నగరం తడిసిన ఆ దుర్ఘటనను ప్రతి సంవత్సరం స్మరించుకుంటూ దేశం అమరవీరులకు నివాళులు అర్పిస్తుంది.
ఈ సంవత్సరం ముంబైలో ‘నెవర్ఎవర్(Never Ever) – మళ్లీ ఎప్పటికీ జరగకూడదు’ అనే థీమ్తో స్మారక కార్యక్రమాలు నిర్వహిస్తున్నారు. గేట్వే ఆఫ్ ఇండియాలో ఎన్ఎస్జీ ఆధ్వర్యంలో జరిగిన ఈ కార్యక్రమంలో ఉగ్రదాడుల్లో మరణించిన వారి ఫొటోలతో ప్రత్యేక స్మారక కేంద్రాన్ని ఏర్పాటు చేశారు. కుటుంబ సభ్యులతో పాటు భద్రతా బలగాల ప్రతినిధులు, ప్రభుత్వ అధికారులు నివాళులు అర్పించారు. రాత్రి సమయంలో గేట్వేను త్రివర్ణ కాంతులతో అలంకరించడంతో పాటు ‘నెవర్ఎవర్’ అనే పదాలతో ప్రత్యేక లైట్ షోను కూడా ఏర్పాటు చేశారు. మరోవైపు ముంబై గల వివిధ విద్యాసంస్థల విద్యార్థులతో శాంతి, ఐక్యత, జాతీయ భద్రతపై ప్రతిజ్ఞ చేయిస్తున్నారు. 11 కాలేజీలు, 26 పాఠశాలల విద్యార్థులు ఈ కార్యక్రమంలో పాల్గొనడం ప్రత్యేకతగా మారింది. యువతలో భద్రతపై అవగాహన పెంపొందించడం, ఉగ్రవాదాన్ని పూర్తిగా తిప్పికొట్టే నిబద్ధతను బలపరచడమే దీని లక్ష్యం.
కాగా, 26/11 ఉగ్రదాడి భారత భద్రతా వ్యవస్థకు వచ్చిన అత్యంత కఠిన పరీక్షల్లో ఒకటి. 10 మంది ఉగ్రవాదులు కరకచర్ సముద్రం నుంచి ఓ ఫిషింగ్ బోట్ను హైజాక్ చేసి, భారత తీరానికి సమీపంగా వచ్చి, మరో చిన్న పడవలో ముంబైకి దిగారు. నగరంలోకి వచ్చిన వెంటనే వారు వేర్వేరు గ్రూపులుగా విడిపోయి ఛత్రపతి శివాజీ టెర్మినస్, తాజ్ హోటల్, ఒబెరాయ్ ట్రైడెంట్, నారిమన్ హౌస్, లియోపోల్డ్ కేఫే వంటి ప్రధాన ప్రాంతాలను లక్ష్యంగా చేసుకున్నారు. విచక్షణారహితంగా కాల్పులు జరిపారు. పర్యాటకులు, ప్రయాణికులు, ఉద్యోగులు.. ఎవ్వరినీ విడిచిపెట్టలేదు. 60 గంటలపాటు సాగిన ఈ నరమేథంలో 166 మంది అమాయకులు ప్రాణాలు కోల్పోయారు. 300 మందికి పైగా గాయపడ్డారు. ఈ నేపథ్యంలోనే రంగంలోకి దిగిన NSG కమాండోలు, మారైన్ కమాండోలు, ఆర్మీ యూనిట్లు ప్రత్యేక ఆపరేషన్ చేపట్టారు. ఈ ఆపరేషన్లో 9 మంది ఉగ్రవాదులు హతమై, అజ్మల్ కసబ్ మాత్రమే బ్రతికి పట్టుబడ్డాడు. తరువాత అతనికి కూడా ఉరిశిక్ష అమలు చేశారు. అయితే 17 ఏళ్లు గడిచినా 26/11 గాయాలు ఇంకా పూర్తిగా మానలేదు. అమరుల త్యాగాన్ని శిరసావహిస్తూ, భవిష్యత్తులో అలాంటి దుర్ఘటనలు మళ్లీ ఎప్పటికీ పునరావృతం కాకూడదన్న సందేశాన్ని ఈ రోజు దేశం మరోసారి నినదిస్తోంది.
