“ప్రజలను నట్టేట ముంచేందుకే బీఆర్ఎస్ పుట్టింది”
చింతకుంట విజయరమణ
300 కోట్లు ఖర్చు చేసి కట్టిన చెక్డ్యాంలు మూనాళ్ల ముచ్చట
ఎనిమిదింటిలోనూ నాణ్యత జీరో
కాకతీయ, కరీంనగర్ : బీఆర్ఎస్ ప్రభుత్వం నిర్మించిన చెక్డ్యాంలన్నీ నాణ్యత లోపాలతో వరుసగా కూలిపోతున్న నేపథ్యంలో, ప్రజలను మోసగించేందుకు మాత్రమే ఆ పార్టీ పనిచేసిందని పెద్దపల్లి ఎమ్మెల్యే చింతకుంట విజయరమణ తీవ్రంగా విమర్శించారు. కరీంనగర్ ఆర్&బీ గెస్ట్హౌస్లో బుధవారం సుడా చైర్మన్ కోమటిరెడ్డి నరేందర్ రెడ్డి, ప్రణవ్, ఆరేపల్లి మోహన్ తదితర కాంగ్రెస్ నేతలతో కలిసి ఆయన విలేకరుల సమావేశం నిర్వహించారు.ఈ సందర్భంగా మాట్లాడుతూ, కరీంనగర్ నుండి మంథని, ముత్తారం వరకు కోట్లాది రూపాయల వ్యయంతో నిర్మించిన ఎనిమిది చెక్డ్యాంలు నాణ్యత లేక వరుసగా కూలిపోతున్నప్పటికీ బీఆర్ఎస్ నాయకులు అబద్ధప్రచారాల్లో మునిగిపోయారని విమర్శించారు. మలహర్, శ్రీరాంపూర్, ముత్తారం, ఓదెల, సుల్తానాబాద్, కరీంనగర్ వరకు నిర్మించిన చెక్డ్యాంలు బీఆర్ఎస్ ప్రభుత్వం రూపొందించిన డిజైన్ ఆధారంగానే నిర్మించబడ్డాయని, అవే ఇప్పుడు వరదలకు తట్టుకోలేక వర్షాకాలాల్లో ధ్వంసమవుతున్నాయని చెప్పారు.జమ్మికుంట సమీపంలో గుంపుల,తనుగుల మధ్య 2020లోనే ఒక చెక్డ్యామ్ కూలిపోయినప్పుడు నీటి పారుదల శాఖ మంత్రిగా హరీష్ రావే ఉన్నారని గుర్తుచేశారు. రైతుల ప్రయోజనాల కోసం కాకుండా ఇసుక మాఫియా కోసం చెక్డ్యాంలు కట్టించుకున్నది బీఆర్ఎస్ ప్రభుత్వమేనని తీవ్రంగా ఎద్దేవా చేశారు. శ్రీరాంపూర్ మండలంలోని మిర్జాంపేట, రూపునారాయణపేట, వీణవంక, మడక, మల్లారెడ్డిపల్లి, గట్టేపల్లి, నీరుకుల్ల, ఖమ్మంపల్లి ప్రాంతాల్లో నిర్మించిన చెక్డ్యాంలు కూడా వరుసగా కూలిపోయాయని వివరించారు.సిరిసిల్లలో దళితులపై దాడులు చేసి ఇసుక దోపిడీ చేసినది బీఆర్ఎస్ నేతల కుటుంబమేనని ఆరోపించారు. కాలేశ్వరం అద్భుతమని చెప్పుకునే వారు టూరిజం ప్లాంట్ అంటూ నిర్మించిన నిర్మాణాలు కూడా ఇప్పుడు కూలిపోయాయని విమర్శించారు. చెక్డ్యాంలు పేల్చేశారన్న ఆరోపణలను నిరూపిస్తే ఏది చెప్పినా సిద్ధమని, నిరూపించలేకపోతే హరీష్ రావు రాజకీయాలకు దూరమయ్యే ధైర్యం ఉందా అని సవాల్ విసిరారు.తాను ఎమ్మెల్యేగా ఉన్న 2009–14 మధ్య గంగారంలో 14 కోట్లతో నిర్మించిన చెక్డ్యామ్ ఎన్నిసార్లు వరదలు వచ్చినా ఏ మాత్రం దెబ్బతినలేదని పేర్కొన్నారు. బీఆర్ఎస్ తొమ్మిదేళ్ల పాలనలో ప్రజలకు ఉపయోగపడే ఒక్క పని కూడా చేయలేదని, రానున్న రోజుల్లో ప్రజలు వారి పాలనకు గట్టి గుణపాఠం చెప్పేందుకు సిద్ధంగా ఉన్నారని తెలిపారు.ఈ సమావేశంలో ఆరేపల్లి మోహన్, కోమటిరెడ్డి నరేందర్ రెడ్డి, ప్రణవ్, అన్నయ్య గౌడ్, మినుపల ప్రకాశ్ రావు, కర్ర రాజశేఖర్, ఆకుల నర్సన్న, గోపగాని సరయ్య గౌడ్, మూల ప్రేమ్ సాగర్, ఆళ్ల సుమన్ రెడ్డి, మాజీ కార్పొరేటర్లు, కార్యకర్తలు పాల్గొన్నారు.
