బీజేపీ బలపర్చిన అభ్యర్థులను ఏకగ్రీవం చేస్తే రూ.10 లక్షలు
బండి సంజయ్ బంపర్ ఆఫర్
కాకతీయ, కరీంనగర్ : గ్రామ పంచాయతీ ఎన్నికల వేళ కేంద్ర హోంశాఖ సహాయ మంత్రి బండి సంజయ్ కుమార్ భారీ ఆఫర్ ప్రకటించారు. బీజేపీ సూచించిన సర్పంచ్ అభ్యర్థులను ఏకగ్రీవంగా ఎన్నుకుంటే,ఆ గ్రామాలకు ప్రత్యేకంగా రూ.10 లక్షల ప్రోత్సాహక నిధులు కేటాయిస్తానని స్పష్టం చేశారు. తాను ఇచ్చిన మాట తప్పే ప్రసక్తే లేదని తెలిపారు.కరీంనగర్ పార్లమెంట్ పరిధిలో గతంలో బీఆర్ఎస్ ఏకగ్రీవ పంచాయతీలకు రూ.5 లక్షల ప్రోత్సాహకం ఇస్తామని చెప్పి ఐదేళ్లైనా ఒక్క రూపాయి ఇవ్వలేదని బండి సంజయ్ విమర్శించారు. కాంగ్రెస్ కూడా అధికారంలో ఉన్న సమయంలో ఏకగ్రీవం పేరుతో నజరానాలు ప్రకటించి ప్రజలను మోసగించిందని ఆరోపించారు.రాష్ట్రానికి డబ్బుల్లేవని సాక్షాత్తు సీఎం రేవంత్ రెడ్డి చెబుతున్నారు. బీఆర్ఎస్ పాలనలోనూ పంచాయతీలకు పైసా రాలేదు. అప్పులు తీసుకుని అభివృద్ధి చేసిన సర్పంచ్లే బిల్లులు రాక నష్టపోయారు. గ్రామాల అభివృద్ధికి నిధులు ఇస్తోంది కేంద్ర ప్రభుత్వమే అని బండి సంజయ్ వ్యాఖ్యానించారు.ఎంపీగా తనకు లాడ్స్ ఫండ్తో పాటు సీఎస్సార్ నిధులు కూడా లభ్యమవుతున్నాయని, ఇప్పటికే విద్య,వైద్య రంగాల్లో కోట్ల రూపాయల అభివృద్ధి పనులు చేపట్టినట్లు పేర్కొన్నారు. ఈ ఎన్నికల్లో బీజేపీ బలపర్చిన అభ్యర్థులను ఏకగ్రీవం చేస్తే ప్రతి గ్రామానికి రూ.10 లక్షలు ప్రత్యేకంగా కేటాయించి అభివృద్ధికి కృషి చేస్తానని హామీ ఇచ్చారు.పంచాయతీ ఎన్నికలు జరగకపోతే కేంద్ర నిధులు రాకపోతాయనే భయంతోనే కాంగ్రెస్ ఎన్నికలు పెట్టింది. వాళ్లకు స్థానిక సంస్థలపై శ్రద్ధ లేదు. పొరపాటున కాంగ్రెస్,బీఆర్ఎస్ అభ్యర్థులను గెలిపిస్తే కొత్త నిధులు రావేమో, వచ్చిన నిధులే దారి మళ్లే ప్రమాదముంది. మోసపోవద్దు ఒళ్లు వంగేలా ఐదేళ్ల నరకయాతన పడకండి అంటూ బండి సంజయ్ ప్రజలకు విజ్ఞప్తి చేశారు.
