ఎకరం రూ. 137 కోట్లు
హైదరాబాద్లో రికార్డు ధర
కోకాపేటలో నియోపోలీస్ లో భూములకు వేలం
సర్వే నంబర్ 17లో ఎకరం ధర 137.25 కోట్లు
ఇటీవల రాయదుర్గంలోని 7.67 ఎకరాలకు రూ. 1357 కోట్లు
హైదరాబాద్లో ఊహకందని విధంగా రియల్ భూమ్
చుక్కలను తాకుతున్న భూముల ధరలు
కాకతీయ, తెలంగాణ బ్యూరో: హైదరాబాద్లో రియల్ భూమ్ ఊహించని విధంగా పెరుగుతోంది. రాజధానిలో భూముల ధరలు చుక్కలను తాకుతున్నాయి. ఎకరం ధర వందల కోట్లు పలుకుతోంది. ఏటేటా నగరంలో భూముల ధరలు రికార్డు సృష్టిస్తున్నాయి. కోకాపేటలో నియోపోలీస్ పరిధిలోని సర్వే నంబర్ 17, 18 లోని భూములకు వేలం నిర్వహించగా.. సర్వే నంబర్ 17లో ఎకరం భూమి 137.25 కోట్లు పలికింది. హెచ్ఎండీఏ పరిధిలోని ఖరీదైన భూములను ఆన్లైన్ వేలం వేయడానికి ప్రభుత్వం నిర్ణయించి నోటిఫికేషన్ జారీచేసిన సంగతి తెలిసిందే. ఇటీవల రాయదుర్గంలోని 7.67 ఎకరాలకు తెలంగాణ పారిశ్రామిక మౌలిక సదుపాయాల సంస్థ (టీజీఐఐసీ) నిర్వహించిన వేలంలో రూ. 1357 కోట్లకు ఓ సంస్థ దక్కించుకుంది. ఇక్కడ కనీస ధర ఎకరాకు రూ. 101 కోట్లుగా నిర్ణయించగా.. వేలంలో రూ. 177 కోట్లకు అమ్ముడపోయింది. ఈనేపథ్యలో తాజాగా కోకాపేట నియో పోలీస్ లోని సర్వే నంబర్ 17, 18లోని భూములను హెచ్ఎండీఏ వేలం వేసింది. ఎకరా కనీస ధర రూ. 99 కోట్లుగా నిర్ణయించగా.. అత్యధికంగా రూ. 137.25 కోట్లు పలికింది. ఇక 2023లో తొలిసారి కోకాపేటలో ఎకరం ధర రూ. 100 కోట్లు పలికిన సంగతి తెలిసిందే.
నాలెడ్జ్ సిటీలో ఎకరం రూ.177 కోట్లు ..
గత నెలలో రాయదుర్గం నాలెడ్జ్ సిటీ ప్రభుత్వ భూముల వేలానికి ఊహించని స్పందన లభించింది. రాయదుర్గం నాలెడ్జ్ సిటీలో ఎకరం ధర రూ.177 కోట్లు పలికి రికార్డు నెలకొల్పింది. ఈ ప్రాంతంలో ఉన్న 18 ఎకరాల ప్రభుత్వ స్థలాన్ని టీజీఐఐసీ వేలంవేసింది. దీంట్లో పాల్గొన్న ఎంఎస్ఎన్ రియాలిటీ సంస్థ అత్యధిక ధరతో 7.6 ఎకరాల భూమిని వేలంలో సొంతం చేసుకుంది. ఒక్క ఎకరానికి రూ.177 కోట్ల చొప్పున మొత్తం రూ.1357 కోట్లకు చేజిక్కించుకుంది. మరో 11 ఎకరాలకు వేలం ప్రక్రియ కొనసాగుతోంది. తెలంగాణ రాష్ట్ర పారిశ్రామిక మౌలిక సదుపాయాల సంస్థ (టీఎస్ఐఐసి) నిర్వహించిన రాయదుర్గం నాలెడ్జ్ సిటీలోని భూముల వేలం పాటలో ఎకరా భూమికి ఏకంగా రూ. 177 కోట్లు చెల్లించి ఎంఎస్ఎన్ రియాల్టీ ఈ భూములను సొంతం చేసుకుంది. రాయదుర్గం నాలెడ్జ్ సిటీ (సర్వే నంబరు 83/1)లోని మొత్తం 18.67 ఎకరాల్లో భాగంగా ఉన్న 7.67 ఎకరాలను ప్రభుత్వం టీఎస్ఐఐసీ ద్వారా వేలం వేసింది.
హోరా హోరీగా పోటీ
రియల్ ఎస్టేట్ రంగంలో నెలకొన్న డిమాండ్ను దృష్టిలో ఉంచుకుని, టీజీఐఐసీ ఈ వేలం కోసం ఎకరాకు రూ. 101 కోట్లుగా ప్రారంభ ధరను నిర్ణయించింది. ఈ వేలంలో ఎంఎస్ఎన్, హెటెరో, మేఘా, బ్రిగేడ్ గ్రూప్, సత్వ, ప్రెస్టీజ్ వంటి ప్రముఖ రియల్ ఎస్టేట్ దిగ్గజ సంస్థలు హోరా హోరీగా పోటీ పడ్డాయి. ఎంఎస్ఎన్ రియాల్టీ సంస్థ ఈ వేలంలో ఎంఎస్ఎన్ రియాల్టీ ఒక్క ఎకరా భూమిని రూ. 177 కోట్లకు దక్కించుకోవడం ద్వారా రికార్డు సృష్టించింది. ఈ ధరతో మొత్తం 7.67 ఎకరాలను ఎంఎస్ఎన్ రియాల్టీ సంస్థ ఏకంగా రూ.1,357 కోట్ల భారీ మొత్తానికి సొంతం చేసుకుంది. ఈ రికార్డు స్థాయి ధర, హైదరాబాద్ రియల్ ఎస్టేట్ మార్కెట్ బలాన్ని, ముఖ్యంగా హైటెక్ సిటీ, గచ్చిబౌలి వంటి కీలక ప్రాంతాలకు సమీపంలో ఉన్న రాయదుర్గం ఏరియా ప్రాముఖ్యతను మరోసారి చాటి చెప్పింది.
