విద్యార్థినిలపై చేయి చేసుకున్న ఉపాధ్యాయురాలు
కాకతీయ, రామకృష్ణాపూర్ : విద్యార్థులను మంచి మార్గంలో నడిపించే ఓ ఉపాధ్యాయురాలు ఏకంగా విద్యార్థినిలపై చెయ్ చేసుకున్న ఘటన రామకృష్ణాపూర్ పట్టణంలోని సాంఘిక సంక్షేమ బాలికల గురుకుల పాఠశాలలో చోటుచేసుకుంది. పాఠశాలలో వ్యాయామ ఉపాధ్యాయురాలు తన బంగారు ఆభరణం కనిపించకపోవడంతో నలుగురు విద్యార్థినిలపై అనుమానం వ్యక్తం చేస్తూ మందలించారు. నలుగురు విద్యార్థినిలపై తీవ్ర కోపంతో ఉపాధ్యాయురాలు చెయ్ చేసుకోవడంతో గాయాలయ్యాయి. ఆదివారం విద్యార్థినీలను చూసేందుకు వచ్చిన తల్లిదండ్రులకు జరిగిన విషయం తెలపడంతో ఉపాధ్యాయురాలుపై ఆగ్రహం వ్యక్తం చేశారు. తమ పిల్లలపై అనుమానం కలిగిన విషయాన్ని తమ దృష్టికి తీసుకురావలసిన మీరే చేయి చేసుకోవడం ఏమిటని ప్రశ్నించారు. ఈ వ్యవహారం కాస్త పోలీసుల వరకు చేరడంతో తక్షణమే పాఠశాలకు చేరుకున్నారు. జరిగిన విషయాన్ని పోలీసులు ఉపాధ్యాయురాలు నుంచి తెలుసుకున్నారు. కాగా కనిపించకుండా పోయిన బంగారు ఆభరణం బాత్రూంలోని గోడ పై ఉంచినట్లు ఇతర విద్యార్థులు తెలపడంతో పోయిన వస్తువు తిరిగి దొరికింది. కాగా ఉపాధ్యాయురాలు చేయి చేసుకున్న నలుగురు విద్యార్థులలో ఒకరికి తీవ్ర గాయాలు కావడంతో తల్లిదండ్రులు ఉపాధ్యాయురాలు పై ఆగ్రహం వ్యక్తం చేస్తున్నారు. పాఠశాలలో ఇలాంటి వ్యవహారాలు మరల జరగకుండా ఉండేందుకు ప్రిన్సిపల్ చర్యలు తీసుకోవాలని పలువురు డిమాండ్ చేస్తున్నారు.
