బీహార్లో ఎన్డీఏ క్లియర్ విక్టరీ.. గెలుపు రహస్యాలివే..!
కాకతీయ, జాతీయం: బీహార్ అసెంబ్లీ ఎన్నికల్లో ఎన్డీఏ కూటమి(బీజేపీ- జేడీయూ) ఆశించినదానికన్నా మెరుగ్గా ప్రదర్శించింది. 243 స్థానాలకు జరుగుతున్న లెక్కింపులో ఆరంభం నుంచి బీజేపీ, జేడీయూ ఆధిక్యంలో కొనసాగుతున్నాయి. బీహార్లో ఎన్డీఏ విక్టరీ దాదాపు స్పష్టమైంది. అయితే ఎగ్జిట్ పోల్స్ను మించిపోయేలా వచ్చిన ఈ ఫలితాల వెనుక ఉన్న ముఖ్య అంశాలు ఏమిటి? ఓటర్లను ఆకట్టుకున్న వ్యూహాలు ఏవీ? అన్న అంశాలను పరిశీలిస్తే..
– బీహార్లో “డబుల్ ఇంజిన్ ప్రభుత్వం” అనే పదం ఎన్నికల ప్రచారంలో కీలక పాత్ర పోషించింది. కేంద్రం–రాష్ట్రం కలిసి పనిచేస్తే అభివృద్ధి వేగవంతం అవుతుందని ఎన్డీఏ బలంగా ప్రచారం చేసింది. మోదీ వ్యక్తిగత ప్రజాదరణ, నితీశ్ కుమార్ పాలనా అనుభవం ఓటర్లపై ప్రభావం చూపాయి. ఈ కాంబినేషన్ ప్రజలకు స్థిరత్వం, అభివృద్ధి హామీలా కనిపించింది.
– సర్కారు అందించిన పలు సంక్షేమ పథకాలు బీహార్ మహిళా ఓటర్లను ఎన్డీఏ వైపు తిప్పాయి. ఉజ్వల గాస్ కనెక్షన్, పీఎం ఆవాస్ యోజన, పీఎం కిషాన్ పథకం, విద్య, ఆరోగ్య సబ్సిడీలు వంటి పథకాలు కుటుంబ స్థాయిలో అందరికీ ప్రత్యక్ష ప్రయోజనాలను అందించాయి. మహిళా ఓటింగ్ ప్యాటర్న్లో ఎన్డీఏకు ఎక్కువ మద్దతు ఈసారి స్పష్టంగా కనిపించింది.
– ఎన్డీఏ ఈసారి ప్రతి నియోజకవర్గంలో అభ్యర్థుల ఎంపికను అత్యంత వ్యూహాత్మకంగా చేసింది. స్థానిక నాయకులకు అవకాశాలు కల్పించింది. సామాజిక సమీకరణపై ప్రత్యేక దృష్టి సారింది. ఇవి ఓటర్లలో విశ్వాసాన్ని పెంచాయి.
– జేడీయూ లోని అంతర్గత గందరగోళం, కొన్ని పెద్దల అసంతృప్తి ఉన్నప్పటికీ మొత్తం కూటమి ఓటు బలంపై పెద్దగా ప్రభావం పడలేదు. ఎన్నికల చివరి దశలో బీజేపీ చేసిన అగ్రెసివ్ ప్రచారం ఈ నష్టాన్ని సమతుల్యం చేసింది.
– గ్రామీణ ప్రాంతాల్లో ఎన్డీఏ బూత్ మేనేజ్మెంట్ చాలా బలంగా ఉంది. బూత్ లెవల్ వాలంటీర్ల నియామకం, ఓటర్లను సరిగ్గా టార్గెట్ చేయడం, స్థానిక సమీకరణల్లో ఏ ఒక్క పొరపాటూ చేయకపోవడం వంటివి తుది ఫలితాల్లో భారీ ప్రభావం చూపాయి.
– మహాఘట్బంధన్ ఈసారి ఐక్యంగా పోరాడలేకపోయింది. గత ఎన్నికలతో పోలిస్తే ఈసారి ప్రతిపక్ష కూటమిలో అంతర్గత అసమ్మతి, చిన్న పార్టీల మధ్య సమన్వయం లోపించడం స్పష్టంగా కనిపించింది. ముస్లిం-యాదవ్ ఓటు బ్యాంక్లో విభజన తలెత్తడం, ఎడమపక్ష పార్టీలకు మద్దతు తగ్గడం వంటి అంశాలు మహాఘట్బంధన్కు పెద్ద దెబ్బ.
– జన్ సురాజ్ పార్టీ, ఎల్జేపీ రామవిలాస్, విఐపీ వంటి చిన్న పార్టీల పోటీ కొన్ని కీలక నియోజకవర్గాల్లో ఓటింగ్ ప్యాటర్న్ను మార్చేశాయి. ప్రత్యక్షంగా ఎన్డీఏకు ఓట్లు రాకపోయినా.. ప్రతిపక్ష ఓటు బ్యాంక్ చీలిపోవడంతో ఎన్డీఏకు గెలుపు మార్గం సులభమైంది. మొత్తంగా మోదీ ఇమేజ్, నితీశ్ స్థిరత్వం, సంక్షేమ పథకాలు, ప్రతిపక్ష విభజన, వ్యూహాత్మక బూత్ మేనేజ్మెంట్ కలయికే ఎన్డీఏకు క్లియర్ విక్టరీని అందించింది.
 ఆశించినదానికన్నా మెరుగ్గా ప్రదర్శించింది. 243 స్థానాలకు జరుగుతున్న లెక్కింపులో ఆరంభం){kind=link}