గ్రామీణ ప్రాంతాల్లోనే నాణ్యమైన ఆరోగ్య సేవలు
మండలాల ప్రజలకు అందుబాటులో ఆసుపత్రి
వర్ధన్నపేట లో 100 పడకల ఆస్పత్రి నిర్మాణానికి శంకుస్థాపన
ఎమ్మెల్యే నాగరాజు, కలెక్టర్ సత్య శారద
కాకతీయ, వరంగల్ ప్రతినిధి: వర్ధన్నపేట, పర్వతగిరి, ఐనవోలు మండలాల ప్రజల అవసరాల దృష్ట్యా ఉప్పరపల్లి క్రాస్ రోడ్ వద్ద 100 పడకల ఆధునిక ప్రభుత్వ ఆసుపత్రి నిర్మాణానికి మంగళవారం వర్ధన్నపేట ఎమ్మెల్యే కేఆర్ నాగరాజు, వరంగల్ జిల్లా కలెక్టర్ సత్యశారద భూమిపూజ చేశారు. ఈ సందర్భంగా ఎమ్మెల్యే నాగరాజు మాట్లాడుతూ.. తెలంగాణ ప్రజా ప్రభుత్వంలో చిత్తశుద్ధితో వర్ధన్నపేట నియోజకవర్గ సమగ్ర అభివృద్ధికి కృషి చేస్తున్నామని, అభివృద్ధి అనేది నిరంతర ప్రక్రియ అని అన్నారు. విద్య, వైద్యరంగంపై ప్రజా ప్రభుత్వం ప్రత్యేక దృష్టి సారించిందని, వంద పడకల ఆసుపత్రి ఈ ప్రాంత ప్రజల కళ అని, అన్ని మండలాల ప్రజలకు అందుబాటులో ఉండాలని ఉద్దేశంతో సుమారు రూ.28 కోట్ల నిధులతో ఆసుపత్రి పనులను చేపడుతామని చెప్పారు. వర్ధన్నపేట నియోజకవర్గానికి డయాలసిస్ సెంటర్ మంజూరయిందని, అందుకు సహకరించిన సీఎం రేవంత్ రెడ్డి, మంత్రి దామోదర రాజనర్సింహలకు ప్రత్యేకత కృతజ్ఞతలు తెలిపారు. త్వరలోనే మున్సిఫ్ కోర్టు ప్రారంభమవుతుందని అన్నారు. కలెక్టర్ డాక్టర్ సత్య శారద మాట్లాడుతూ వర్ధన్నపేట నియోజకవర్గం వేగంగా అభివృద్ధి చెందుతున్న ప్రాంతమని, మామునూరు ఎయిర్పోర్ట్ ఏర్పాటుతో ఈ ప్రాంతంలో మరింత అభివృద్ధి జరుగుతుందని అన్నారు. ప్రస్తుతం 300, 400 ఓపీ పేషెంట్లు వస్తున్నారని, భవిష్యత్తులో వారి సంఖ్య పెరిగే అవకాశం ఉందని తెలిపారు. కార్యక్రమంలో జిల్లా అదనపు కలెక్టర్ సంధ్యారాణి, డీఎం హెచ్ ఓ డాక్టర్ సాంబ శివరావు, డీసీహెచ్ రామ్మూర్తి, పర్యవేక్షకులు నరసింహ స్వామి, ఇల్లంద వ్యవసాయ మార్కెట్ కమిటీ చైర్మన్ నరుకుడు వెంకటయ్య, ఐనవోలు ఆలయ కమిటీ చైర్మన్ ప్రభాకర్ గౌడ్, ఆత్మకూర్ ఏఎంసీ వైస్ చైర్మన్ తిరుపతి, తదితరులు పాల్గొన్నారు.
