కారు బాంబు కుట్రలో కొత్త మలుపు.. షాహిన్–ముజమ్మిల్ భార్యాభర్తలే!
ఢిల్లీ కారు బ్లాస్ట్‌ కేసులో సంచలనం
షాహిన్–ముజమ్మిల్ భార్యాభర్తలే అన్న నిజం బ‌ట్ట‌బ‌య‌లు
జైషే మహ్మద్ నెట్వర్క్‌లో షాహిన్ చురుకుదనం
కాకతీయ, నేష‌న‌ల్ డెస్క్‌: ఢిల్లీలో ఎర్రకోట సమీపంలో జరిగిన కారు బాంబు పేలుడు కేసు దర్యాప్తు రోజురోజుకూ కొత్త కోణాలు సంతరించుకుంటోంది. ఇప్పటివరకు గర్ల్‌ఫ్రెండ్‌గా చెప్పబడిన డాక్టర్ షాహిన్ షహిద్ సహనిందితుడు ముజమ్మిల్ షకీల్ భార్య అని విచారణలో వెల్లడైంది. 2023లో అల్-ఫలా యూనివర్సిటీ దగ్గర ఉండే మతపరమైన స్థలంలో వీరు నిఖా చేసుకుని, రహస్యంగా జీవించినట్టు షకీల్ వివరించాడు.
షాహిన్ పాత్ర దర్యాప్తులో మరింత కీలకంగా మారింది. 2023లో ముజమ్మిల్‌కు ఆయుధాలు కొనుగోలు చేయడానికి ఆమె రూ. 6.5 లక్షలు అందజేసినట్టు, 2024లో బాంబర్ ఉమర్ నబీ కోసం ఫోర్డ్ ఎకోస్పోర్ట్ కొనడానికి మరో రూ. 3 లక్షలు ఇచ్చినట్టు ఆధారాలు బయటపడ్డాయి. మొత్తం మీద జైషే మహ్మద్ మాడ్యూల్ కార్యకలాపాలకు రూ. 27–28 లక్షల వరకు ఆమె ‘విరాళం’ పేరిట సమకూర్చినట్లు నిఘా వర్గాలు గుర్తించాయి.
జైషే మహ్మద్ మహిళా యూనిట్‌లో షాహిన్‌కు ప్రాధాన్యత ఉందనే విషయం ఇప్పటికే బయటపడింది. పాక్‌ ఆదేశాల మేరకు భారతదేశంలో మహిళా బ్రిగేడ్‌లను ఏర్పరచడం, రిక్రూట్‌మెంట్ నిర్వహించడం వంటి కార్యకలాపాలు ఆమె ద్వారా సాగినట్టు అనుమానాలు ఉన్నాయి. మసూద్ అజార్ సోదరి సాదియా అజార్ నేతృత్వం వహిస్తున్న జమాత్ ఉల్ మొమినాత్ విభాగంలో షాహిన్ యొక్క ఇన్వాల్వ్‌మెంట్‌పై NIA ప్రత్యేక దృష్టి పెట్టింది.
భారత్ ఇటీవల చేపట్టిన ఆపరేషన్ “సిందూర్”లో జైషే చీఫ్ మసూద్ అజార్ కుటుంబం దెబ్బతినడంతో, ఈ మాడ్యూల్ కార్యకలాపాలు విచ్ఛిన్నం అయ్యాయి. దాంతో భారత భూభాగంలో నిద్రాణ కణాలు, మహిళా బ్రిగేడ్ ఆక్టివిటీలు తిరిగి చురుకుగా మారాయా అనే కోణంలో దర్యాప్తు సాగుతోంది. నవంబర్ 10న ఎర్రకోట దగ్గర జరిగిన కారు బాంబు పేలుడు వెనుక ఉన్న కుట్రను పూర్తిగా అన్‌రావెల్ చేయడానికి NIA అడుగులు వేగవంతం చేసింది. ఇప్పటివరకు కేసులో ఏడుగురిని అరెస్ట్ చేసినా, షాహిన్–ముజమ్మిల్ సంబంధం బయటపడటం దర్యాప్తుకు కొత్తదారులు తీసుకువచ్చింది. జైషే మాడ్యూల్‌లోని పెద్దల ఆదేశాల మేరకా లేక స్థానికంగా పన్నిన ప్లానా అన్నది ఇంకా స్పష్టత రాలేదు.
